| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 20.155 | Dem. 20.158 (English) | >>Dem. 20.161 |
20.157αἰσχρός , ὦ ἄνδρες Ἀθηναῖοι , καὶ κακῶς ἔχων ὁ νόμος , καὶ ὅμοιος φθόνῳ τινὶ καὶ φιλονικίᾳ καὶ —τὸ λοιπὸν ἐῶ · τοιούτοις δέ τισιν προσέοιχʼ ὁ γράφων χρῆσθαι . ὑμῖν δʼ οὐχὶ πρέπει τὰ τοιαῦτα μιμεῖσθαι , οὐδʼ ἀνάξια φαίνεσθαι φρονοῦντας ὑμῶν αὐτῶν . φέρε γὰρ πρὸς Διός , τί μάλιστʼ ἂν ἀπευξαίμεθα πάντες , καὶ τί μάλιστʼ ἐν ἅπασι διεσπούδασται τοῖς νόμοις ; ὅπως μὴ γενήσονται οἱ περὶ ἀλλήλους φόνοι , περὶ ὧν ἐξαίρετος ἡ βουλὴ φύλαξ ἡ ἐν Ἀρείῳ πάγῳ τέτακται .
20.158ἐν τοίνυν τοῖς περὶ τούτων νόμοις ὁ Δράκων φοβερὸν κατασκευάζων καὶ δεινὸν τό τινʼ αὐτόχειρʼ ἄλλον ἄλλου γίγνεσθαι , καὶ γράφων χέρνιβος εἴργεσθαι τὸν ἀνδροφόνον , σπονδῶν , κρατήρων , ἱερῶν , ἀγορᾶς , πάντα τἄλλα διελθὼν οἷς μάλιστʼ ἄν τινας ᾤετʼ ἐπισχεῖν τοῦ τοιοῦτόν τι ποιεῖν , ὅμως οὐκ ἀφείλετο τὴν τοῦ δικαίου τάξιν , ἀλλʼ ἔθηκεν ἐφʼ οἷς ἐξεῖναι ἀποκτιννύναι , κἂν οὕτω τις δράσῃ , καθαρὸν διώρισεν εἶναι . εἶτʼ ἀποκτεῖναι μὲν δικαίως ἔν γε τοῖς παρʼ ὑμῖν νόμοις ἐξέσται , χάριν δʼ ἀπαιτεῖν οὔτε δικαίως οὔθʼ ὁπωσοῦν διὰ τὸν τούτου νόμον ;
20.159μηδαμῶς , ὦ ἄνδρες Ἀθηναῖοι · μὴ βούλεσθε δοκεῖν πλείω πεποιῆσθαι σπουδὴν ὅπως μηδενὶ τῶν εὖ τι ποιούντων ὑμᾶς χάριν ἐξέσται κομίσασθαι ἢ ὅπως μηδεὶς φόνος ἐν τῇ πόλει γενήσεται · ἀλλʼ ἀναμνησθέντες τῶν καιρῶν , παρʼ οὓς εὖ πεπονθότες εὖ πεποιήκατε τοὺς εὑρομένους , καὶ τῆς Δημοφάντου στήλης περὶ ἧς εἶπε Φορμίων , ἐν ᾗ γέγραπται καὶ ὀμώμοται , ἄν τις ἀμύνων τι πάθῃ τῇ δημοκρατίᾳ , τὰς αὐτὰς δώσειν δωρειὰς ἅσπερ Ἁρμοδίῳ καὶ Ἀριστογείτονι , καταψηφίσασθε τοῦ νόμου . οὐ γὰρ ἔνεστʼ εὐορκεῖν , εἰ μὴ τοῦτο ποιήσετε .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 20.155 | Dem. 20.158 (English) | >>Dem. 20.161 |
